Bjarni Helgason, íþróttafréttamaður á Morgunblaðinu, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþrótavikunni á 433.is.
KR og Valur mættust í ótrúlegum leik í Bestu deild karla á dögunum. Lauk honum með 3-3 jafntefli, þar sem Vesturbæingar skoruðu jöfnunarmarkið af vítapunktinum í blálokin. Aldrei átti þó að dæma víti þar sem brot Hólmars Arnar Eyjólfssonar átti sér stað langt fyrir utan teig.
„Það er dómaraskandall sem ræður úrslitum þarna,“ sagði Helgi ómyrkur í máli.
Hrafnkell og Bjarni vildu þó heldur skella skuldinni á Hólmar í þessu máli.
„Já, en í leiðinni ótrúleg heimska sem Hólmar gerir sig sekan um,“ sagði Hrafnkell.
„Hólmar er svo solid gæi, klár og jarðbundinn, orðinn þetta gamall, að láta veiða sig í þetta,“ sagði Bjarni um málið.
Valur er með 2 stig eftir tvo leiki, líkt og KR, en meðlimir þáttarins eru ekki hrifnir af gangi mála hjá Val.
„Við erum með lið sem er fullt sjálfstrausts (KR) og svo erum við með Val, það er bara erfitt að horfa á þetta,“ sagði Hrafnkell.
Bjarni telur að Valur sé ekki með réttan þjálfara við stjórnvölinn.
„Ég skildi aldrei þessa ráðningu á Túfa. Þetta er ekki prófíllinn sem Valur tekur. Hann er bara varnarþjálfari.“
Nánar í spilaranum.
