Þorri Mar Þórisson hefur rift samningi sínum við Öster. Þetta staðfestir hann í samtali við 433.is en hann og félagið komust að samkomulagi þess efnis.
Það var Smålandsposten sem sagði frá því í gær að Þorri væri að fara frá Öster og Fótbolti.net fjallaði svo um.
Er hann orðaður við KR, Stjörnuna, Val og KA nú þegar hann gæti komið heim.
Samkvæmt heimildum 433.is hafa nokkur erlend lið haft augastað á Þorra síðustu vikur en hann skoðar einnig kosti sína á Íslandi.
Þorri lék ellefu leiki með Öster á síðustu leiktíð þegar liðið tryggði sér sæti í efstu deild í Svíþjóð.
Bakvörðurinn knái ólst upp á Dalvík en lék með KA til ársins 2023 þegar hann hélt í atvinnumennsku, hann getur spilað bæði hægri og vinstri bakvörð.
Hann var nálægt því að ganga í raðir Vals fyrir tímabilið 2023 en var síðan seldur í atvinnumennsku nokkrum mánuðum síðar. Þorri er 25 ára gamall.
