Jónatan Ingi Jónsson leikmaður Vals hefur framlengt samning sinn við félagið um tvö ár. Jónatan, sem áður var samningsbundinn Val út tímabilið 2027, mun því spila fyrir félagið út tímabilið 2029.

Jónatan Ingi sem er 26 ára hefur verið einn af lykilleikmönnum Vals og einn af hættulegustu og mest skapandi sóknarmönnum deildarinnar.

Jónatan hafði verið orðaður við bæði Víking og KR í haust en verður áfram á Hlíðarenda.

Jónatan Ingi Jónsson, leikmaður Vals: „Mér líður mjög vel með það að hafa framlengt við Val. Mér hefur liðið vel á Hlíðarenda og stefna nýrrar stjórnar knattspyrnudeildar er skýr og metnaðarfull. Ég finn að nýtt þjálfarateymi er að koma með eitthvað ferskt að borðinu og það eru jákvæðir hlutir í loftinu. Ég var alltaf jákvæður fyrir því að framlengja, þrátt fyrir það sem kann að hafa verið skrifað í fjölmiðlum. Þetta er stór dagur fyrir mig og ég hlakka til þess að vera lykilmaður hér að Hlíðarenda næstu árin.“

Gareth Owen tæknilegur ráðgjafi knd. Vals: „Jónatan Ingi er algjör lykilleikmaður fyrir Val. Hann er að leggja af stað í sín bestu ár í fótboltanum, á frábærum aldri og hefur bæði gæði og reynslu til að leiða liðið áfram. Leikgreind hans, sköpunarhæfni og sá stöðugleiki sem hann hefur sýnt gera hann að algjörum lykilmanni í því sem við ætlum okkur næstu árin. Þetta er stór dagur fyrir félagið.“

Hermann Hreiðarsson þjálfari Vals: „Jónatan er einn af okkar allra mikilvægustu leikmönnum og það sést í öllum lykiltölum leiksins hversu miklu máli hann skiptir. Hann vinnur leiki fyrir okkur með gæðum sínum, heldur uppi hraða og skapar stöðugt hættu. Það er geggjað að við séum að tryggja hann til lengri tíma — þetta eru skýr skilaboð um metnað Vals.“