Samkvæmt heimildum Daily Mail hafa tveir bandarískir fjárfestahópar, sem báru áður áhuga á að kaupa Sheffield Wednesday, sameinað krafta sína og lagt fram sameiginlegt tilboð.

Milljarðamæringurinn John McEvoy hefur tekið höndum saman við Storch-fjölskylduna, sem áður var tengd við kaup á Plymouth Argyle, eftir að báðir aðilar höfðu upphaflega skilað inn sitt hvoru boðinu.

Að auki hefur nýtt tilboð borist frá ónefndum aðila, en baráttan um að taka við félaginu heldur áfram.

Umsjónarmenn söluferlisins vonuðust til að tilnefna kjörinn kaupanda fyrir föstudag, en tímalínan hefur verið framlengd.

McEvoy á hlut í MLB-félaginu Colorado Rockies og NHL-liðinu Nashville Predators og hefur áður verið orðaður við kaup á Coventry City.

Talið er að hann hafi haft samband við tónlistarmanninn Jon McClure, stuðningsmann Wednesday og söngvara Reverend and the Makers, til að spyrjast fyrir um stöðu félagsins.

McEvoy á minnihlutahlut í Various Artists, umboðsskrifstofu hljómsveitar McClure. Um Storch-fjölskylduna er lítið vitað.