Það var mikið fjör í ensku úrvalsdeildinni í kvöld, þar sem þrír leikir fóru fram.
Fulham tók á móti Manchester City og stefndi í þægilegan sigur gestanna. Erling Braut Haaland, Tijjani Reijnders og Phil Foden komu þeim í 0-3 áður en Emile Smith Rowe minnkaði muninn skömmu fyrir hlé.
Foden kom City í 1-4 áður en Sander Berge skoraði sjálfsmark. Útlitið ansi gott fyrir bláliða. Þá tóku heimamenn hins vegar við sér. Alex Iwobi klóraði í bakkann áður en Samuel Chukwueze setti tvö mörk og nóg eftir.
Fulham tókst þó ekki að jafna og lokatölur því 4-5. City er í öðru sæti deildarinnar tveimur stigum á eftir Arsenal sem á þó leik til góða. Fulham er í 15. sæti með 17 stig.
Newcastle mætti þá Tottenham í hörkuleik. Mörkin létu á sér standa en Bruno Guimaraes kom heimamönnum yfir þegar 20 mínútur lifðu leiks. Cristian Romero jafnaði nokkrum mínútum síðar en Anthony Gordon kom Newcastle aftur yfir af vítapunktinum.
Miðvörðurinn Romero jafnaði þó aftur í blálokin og lokatölur 2-2. Tottenham fer þar með upp fyrir Newcastle á markatölu, en bæði lið eru með 19 stig um miðja töflu.
Loks vann Everton öflugan útisigur á Bournemouth, þar sem Jack Grealish skoraði eina markið. Everton fór þar með upp fyrir Bournemouth og í níunda sætið.
