Þrjár fyrrum poppstjörnur eru nú að undirbúa það að kaupa lið Chorley sem leikur í sjöttu efstu deild Englands.
Frá þessu greina ýmsir miðlar en mennirnir umtöluðu eru þeir Brian McFadden, Keith Duffy og Shane Lynch.
McFadden gerði garðinn frægan sem söngvari í írsku hljómsveitinni Westlife og Duffy og Lynch voru þá hluti af Boyzone.
,,Við erum ansi nálægt þessu. Ég hef mikið talað um að mæta á næsta heimaleik með fjölskyldunni – þið fáið að sjá nokkuð mikið af okkur,“ sagði McFadden.
McFadden er sjálfur stuðningsmaður Manchester United en hann er 43 ára gamall.
Westlife er enn að í dag en hljómsveitin hóf störf aftur árið 2018 – síðasta lag þeirra var þó gefið út fyrir tveimur árum.
