Þeir sem eru að íhuga það að mæta án miða á leik Breiðabliks og Víkings á sunnudag ættu að hugsa sig tvisvar um, Hjörvar Hafliðason segir að það geti hreinlega skapað hættulegt ástand.

2500 aðilar geta mætt á úrslitaleik Breiðabliks og Víkings í Bestu deild karla á sunnudag. Líklega hefði verið hægt að selja yfir 6 þúsund miða á leikinn.

Nokkur umræða hefur skapast um það að fólk ætli að mæta miðalaust í Víkina og standa fyrir utan girðingu vallarins.

„Það er mjög mikilvægt að fólk fari ekki að mæta miðalaust í Víkina á sunnudaginn, það getur komið upp ömurlegt ástand ef fólk er að reyna að svindla sér inn eða troða sér einn. Margir harmleikir tengdir fótboltanum eiga rætur sínar að rekja til þess,“ sagði Hjörvar í nýjasta þættinum af Dr. Football.

Hjörvar segir að sjálfboðaliðar og þeir sem koma að leiknum eigi það ekki skilið. „Það er mjög mikilvægt að þeim sem langar rosalega á völlinn, ekki fara fyrir utan völlinn. Það er ekki til endalaust af fólki og sjálfboðaliðum til að meina fólki aðgang.

„Það eru leiðir til að horfa yfir Fossvoginn fallega, ég mæli með því að enginn reyni að svindla sér inn á völlinn.“

Stuðningsmannaklúbbur Breiðabliks hins vegar hvetur fólk til að mæta miðalaust á svæðið. „Að sama skapi vilja Kópacabana menn hvetja Breiðabliks fólk sem ekki fær miða til að umlykja völlinn og syngja og öskra að vellinum, strákarnir munu finna það inn að beinum!,“ segir á vefsvæði stuðningsmanna Breiðabliks.