Kári Árnason og Lárus Orri Sigurðsson setja stórt spurningarmerki við þá ákvörðun Age Hareide, landsliðsþjálfara að velja ekki Gylfa Þór Sigurðsson í hópinn.

Draumur Íslands um sæti á EM er úr sögunni eftir sárgrætilegt tap gegn Úkraínu í kvöld sem unnu þennan úrslitaleik.

„Maður skilur að hafa ekki valið hann út frá því, einu rökin sem ég sé fyrir því að velja hann ekki er að við vitum ekki standið. Þá á að hoppa upp í vél og sjá hvernig hann stendur, hann getur hjálpað okkur ef hann getur spilað korter,“ sagði Kári Árnason.

„Svona leikmenn geta alltaf hjálpað þér, ég hefði viljað Kolbein Sigþórsson með á HM þrátt fyrir að hann hefði bara getað spilað fimm mínútur.“

Lárus Orri segir að Hareide hefði átt að fara upp í flugvél til Spánar og horfa á Gylfa æfa þar með Fylki og síðan Val.

„Það eru skiptar skoðanir um þetta, fótbolti er ekki svart og hvítt. Þetta er allt á gráum svæðum, þú átt ekki að taka menn í landslið sem eru ekki í liði og ekki að spila reglulega. En svo koma svona hlutir eins og með Gylfa, við erum að tala um Gylfa sem hefur gert allt þetta fyrir fótboltann á Íslandi. Það hefði engin kvartað, hann valdi Aron Einar fyrir áramót þegar hann var ekki að spila neitt. Farðu til Spánar og skoðaðu hann, sjáðu hann æfa með Fylki og Val.“