Oliver Kahn neitar því að hann hafi misst sig þegar hann heyrði af því að hann væri rekinn frá Bayern Munchen fyrir helgi.
Sögusagnir hafa verið á kreiki að Kahn hafi tekið brottrekstrinum mjög illa en hann starfaði sem stjórnarformaður félagsins.
Kahn var bannað að mæta á leik Bayern gegn Köln um helgina sem tryggði liðinu sigur í Bundesligunni.
Talað hefur verið um að Kahn hafi orðið bálreiður er hann heyrði af ákvörðun félagsins en hann harðneitar þeim sögusögnum.
,,Það að ég hafi misst vitið þegar mér var sagt frá brottrekstrinum er svo sannarlega ekki rétt,“ sagði Kahn.
,,Ég fékk símtal á föstudaginn frá Herbert Hainer sem lét mig vita af ákvörðuninni. Þetta var rólegt og sanngjarnt símtal.“
,,Á laugardaginn var mér tjáð að ég gæti ekki mætt á leikinn gegn Köln og ég tók þeirri ákvörðun rólega. Auðvitað er ég vonsvikinn en ég er gríðarlega ánægður með sigurinn í deildinni.“