Martin Ödegaard, fyrirliði Arsenal, segir að leikmenn liðsins séu alls ekki ánægðir með hvernig tímabilið á Englandi endaði.
Arsenal hafnaði í öðru sæti deildarinnar, fjórum stigum á eftir toppliði Manchester City eftir lokaumferðina í gær.
Arsenal var þó lengi í bílstjórasætinu en missteig sig undir lokin og viðurkennir Norðmaðurinn að enginn sé sáttur með árangurinn að lokum.
Arsenal endaði tímabilið þó vel og vann öruggan 5-0 heimasigur á Wolves.
,,Við vorum alls ekki ánægðir með lok tímabilsins. Þegar sú tilfinning fer þá getum við horft til baka með stolti held ég yfir tímabilið í heild sinni en eins og er þá er þetta sársaukafullt og pirrandi,“ sagði Ödegaard.
,,Eftir þar sem við vorum allt tímabilið þá erum við ekki ánægðir með annað sætið. Það er gott afrek og allir hefðu tekið það fyrir fram en við vildum vinna deildina og vorum í stöðu til að gera það. Það er gott merki að við séum vonsviknir og við eigum að vera það.“
Enski boltinn á 433 er í boði 
