Fyrrum knattspyrnumaðurinn Michael Owen er greinilega allt annað en hrifinn af þeirri hugmynd að Harry Kane fari til Bayern Munchen.
Tottenham samþykkti í dag tilboð Bayern upp á meira en 100 milljónir evra. Nú þarf Kane sjálfur að taka ákvörðun um hvað hann vill gera.
„Ég veit að Bayern er risastórt félag og ég ber mikla virðingu fyrir þeim en ef ég væri Harry Kane myndi ég vera áfram hjá Tottenham. Það er ekkert frábær árangur að vinna bikar með Bayern. Ég myndi skilja ef hann færi í Real Madrid eða eitt af tveimur bestu liðum Englands,“ skrifar Owen á samfélagsmiðla.
Owen vill að Kane verði áfram á Englandi til að ná markameti Alan Shearer í ensku úrvalsdeildinni. Það er 260 mörk en Kane er í 213 mörkum.
„Að verða markahæsti leikmaður í sögu ensku úrvalsdeildarinnar er stærra afrek en að vinna deild þar sem eitt lið hefur mikla yfirburði.“
