Það var líf og fjör í Íþróttavikunni með Benna Bó í þetta skiptið. Þorgerður Katrín Gunnarsdóttir, formaður Viðreisnar, mætti þá í settið. Með henni þar sat Hörður Snævar Jónsson, fréttastjóri íþróttafrétta á Torgi.

Vestri vill betri aðstöðu á knattspyrnusvæði sitt, enda lítil sem engin aðstaða sem stendur. Þorgerður var spurð út í málið.

„Það er ekki spurning með Vestra en það er líka mjög mikið álag á sveitafélögunum. Svo ég taki upp hanskann fyrir þau eru þau að standa sig vel á höfuðborgarsvæðinu en þetta eru mjög fjárfestingaríkar framkvæmdir sem verið er að fara í. Við erum að sjá þetta bras sem er búið að vera með þjóðarhöllina. Ég ætla rétt að vona og bind vonir við að þjóðarhöllin verði komin 2025. Annars er mér að mæta. Ég mæti bara með skófluna.

Varðandi Vestra hefði ég gjarnan viljað sjá KSÍ, sem er vel stætt, reyna að hjálpa til. Þetta er álag. Á endanum kemur þetta einhvers staðar frá. Sveitafélögin standa frammi fyrir skyldum eins og að reka leikskóla og grunnskóla. Það eru þeirra grunnskyldur.“

Hörður hrósar Vestra fyrir að vera á þeim stað sem liðið er.

„Það er kraftaverk hjá Vestra að vera í Lengjudeild karla við þessar aðstæður. Þeir gera sér grein fyrir stærð sveitafélagsins og eru ekki að biðja um höll. Þeir eru að biðja um upphitaðan gervigrasvöll til að vinna á mesta snjónum yfir veturinn.“