Salan á Kristal Mána Ingasyni frá Víkingi R. til Rosenborg í sumar var til umræðu í sjónvarpsþætti 433.is á mánudag. Þar var Arnar Gunnlaugsson gestur.
Kristall hafði verið besti leikmaður Víkings framan af sumri. Hann var svo seldur til norska stórliðsins.
„Við reyndum ekki að stoppa þetta, meira að aðstoða Kristal að gera sér grein fyrir að hann þyrfti ekki að fara út í hvað sem er. Það voru lið búin að hafa samband sem flokkast meira sem „hvað sem er.“ En tímapunkturinn þegar lið eins og Rosenborg kemur með gott tilboð og leikmaðurinn er tilbúinn að fara, það erfitt að halda þessum strákum heima,“ sagði Arnar.
Hann var ekki sáttur með að missa sinn besta leikmann en skildi stöðuna þó.
„Sem þjálfari væri galið að sitja hérna og segja að ég hafi verið blússandi ánægður, en það var ekkert sem klúbburinn gerði rangt eða leikmaðurinn sjálfur.“
Brotthvarf Kristals hafði töluverð áhrif að sögn Arnars.
„Auðvitað hefur það áhrif á leikstíl liðsins og gengið að missa besta leikmanninn, ég tala nú ekki um þegar þetta er þannig leikmaður að við erum í raun háðir hans leikstíl. Það tók smá tíma að jafna út spilamennskuna eftir brotthvarf hans.“