Alexander Ágúst Mar Sigurðsson skrifaði á dögunum B.S. rannsókn við sálfræðideild Háskólans í Reykjavík þar sem hann reyndi að rannsaka klefamenningu í íslenskum fótbolta. Hann skrifar pistil um niðurstöðuna á vefnum Fótbolti.net í dag.
„Hugtakið klefamenning kom víða upp í umræðu um #metoo og ásakanir á hendur íslenskum landsliðsmönnum í knattspyrnu árið 2021. Þó að hugtakið sé víða notað eru fræðimenn ekki sammála um inntak þess. Í raun virðist það eiga við um tal og hegðun karlmanna þegar þeir koma saman í hópum og er ekki einskorðuð við búningsklefa, heldur getur átt sér stað í golfferðum, veiðiferðum, grillveislum og ýmis konar mannamótum svo dæmi séu tekin,“ segir í pistli Alexanders sem hann birtir á Fótbolta.net.
Alexander tók viðtöl við íslenska knattspyrnumenn sem höfðu að minnsta kosti leikið 50 leiki í efstu deild, 17 ára aldursmunur var á yngsta og elsta viðmælanda. Margir höfðu leikið erlendis á ferlinum og eða komið við sögu í A-landsliði karla.
„Þó að leikmenn könnuðust við að hafa upplifað neikvæða klefamenningu, var það sjaldan innan sjálfs klefans. Nafnið á hugtakinu virðist þannig skapa misskilning um það sem er raunverulega verið að ræða. Þátttakendur vildu meina að það væri mun meira jákvætt við það að tilheyra liði,“ segir Alexander meðal annars í pistli sínum á Fótbolta.net.
„Eins og í flestum öðrum geirum skiptir máli hver setur tóninn. Það á við um þjálfara og aðra starfsmenn, sem og helstu leiðtoga leikmannahópsins.“
Alexnader skrifar svo um A-landslið karla eftir viðtölin sín. „Athyglisvert var að sumir þátttakendur töluðu af eigin reynslu um að menningu innan A landsliðs karla hefði verið ábótavant, og á skjön við jákvæðari menningu í sínum félagsliðum. Það væri eins og menn tækju skref niður á við í þroska þegar þeir kæmu í landsliðið.“
„Stór þáttur sem ýtir undir andlega vanlíðan er klefamenning sem einkennist af ótta, ofbeldi eða niðurlægingu.“
Hér eru dæmi um svör fótboltamanna sem Alexander birtir:
„Klefamenning er byggð á sleggjudómum og alhæfingum um alla en ekki þá sem eiga að fá skítinn”.
„Landsliðið er ekki staður né stund fyrir veiklyindi. Snýst um að vinna leiki”.
„Menn eru komnir út úr sínu umhverfi sem þeir eru fastir í og þeir eru kannski með einhverja djöfla og þarna telja þeir sig geta komist upp með þá án þess að það fari í eitthvað venjulegt umhverfi og þetta fær að grassera ef að kúltúrinn leyfir það”.