Arnar Grétarsson, þjálfari KA, hefur tjáð sig eftir að hann var dæmdur í fimm leikja agabann á dögunum. Hann var til viðtals í hlaðvarpsþættinum Þungavigtin í dag.
Bannið fékk Arnar fyrir hegðun sína í leik KA gegn KR í síðustu viku og orð sem hann lét falla í garð Sveins Arnarssonar, fjórða dómara leiksins.
Arnar kallaði Svein „fokking fávita“ í leiknum. Þá hafa orðrómar verið á kreiki um að Arnari og Sveini hafi lent saman daginn eftir leik, það hafi lengt bann agabann þjálfarans frekar.
„Það sem gerist eftir rauða spjaldið er að ég haga mér á alveg óásættanlegan máta og spring. Það er eitthvað sem ég sé gríðarlega eftir. Ég nýti tækifærið hér til að biðja þessa einstaklinga afsökunar. Það er ekkert sem afsakar það, þó dómarar séu slakir, að maður missi sig eins og ég gerði. Ég missti hausinn og hagaði mér gríðarlega illa,“ segir Arnar.
Hann sagði svo frá því er hann hitti Svein daginn eftir leik.
„Það eru liðnir 10-12 tímar frá þessu atviki. Ég er að rölta af minni skrifstofu og er á leiðinni í klefanna. Þar labba ég fram hjá skrifstofu sem er við hliðina á minni. Þar sé ég fjórða dómara að rölta inn í herbergi inni á skrifstofu þar sem handboltaþjálfararnir eru. Þar er hann með kaffibolla og það er enginn annar inni. Ég var ekki enn búinn að jafna mig á þessu, nokkrum klukkutímum seinna, og vísa honum út. Ég notaði ekki ljót orð en var heitt í hamsi.“
Að sögn Arnars hafði Sveinn verið að fara með barn sitt á æfingu hjá KA. Eftir það fékk hann sér kaffi og hélt í átt að skrifstofunum.
„Ég held að dómarar leggi það almennt ekki í vana sinn að fara beint upp og nudda salti í sárið. Það eina sem ég geri er að vísa honum út og ég spyr hann hvort hann hafi ekki sóma í sér að halda sig fjarri og gefa manni allavega dag til að jafna sig á hlutunum. Ef hann hefði mætt degi eða tveimur seinna hefði ég beðið hann afsökunar á mínu framferði.“
„Ég held að flestir sem tengjast knattspyrnu, dómarar og aðrir, ég held að engum hefði dottið í hug að vera að mæta daginn eftir, í ljósi aðstæðna.“
Arnar ítrekar þó að hann sjái eftir gjörðum sínum.
„Ef ég sé hann þá bið ég hann afsökunar á mínu framferði. Alveg sama hvernig hann stóð sig og hvernig ég lít á það hvernig hann stóð sig, það réttlætir ekki mína framkomu. Ég fór yfir strikið og það er ekkert hægt að verja það.“