Davíð Smári Lamude, þjálfari Kórdrengja, er sáttur með dráttinn í 8-liða úrslitum Mjólkurbikarsins. Liðið dróst gegn FH-ingum á heimavelli.
„Ég er sáttur að fá heimaleik, hlakka til að fá FH-inga í Safamýrina,“ sagði Davíð Smári við 433.is í höfuðstöðvum KSÍ eftir dráttinn í dag.
Kórdrengir léku aðeins í fyrsta sinn í deildarkeppni árið 2017, þá í 4. deild. Síðan þá hefur uppgangurinn verið mikill og liðið nú komið í 8-liða úrslit bikarsins. „Það er risastórt fyrir okkur. Það er ótrúlega mikil tilhlökkun að fá að taka þátt í þessu,“ sagði Davíð.
Kórdrengir ætla sér stóra hluti í Lengjudeildinni í ár en liðið er í áttunda sæti sem stendur. Þó er deildin afar jöfn og liðið aðeins sex stigum frá öðru sæti. „Spilamennskan okkar hefur verið góð. Mér finnst vera stígandi í liðinu. Við lendum í meiðslaveseni í byrjun og erum að klóra okkur til baka úr því. Við erum enn í séns í deildinni og í 8-liða úrslitum í bikar svo hingað til er ekkert svekkelsi. Við erum sáttir með stöðuna, inni í þessu öllu ennþá.“
