Roy Keane verður þessa stundina fyrir harðri gagnrýni í Brasilíu fyrir ummæli sín um dans leikmanna og þjálfara landsliðsins í sigri á Suður-Kóreu í 16-liða úrslitum Heimsmeistaramótsins í Katar.
Brasilía vann öruggan 4-1 sigur á Kóreumönnum í gær og er liðið komið í 8-liða úrslit. Öllum mörkunum var fagnað með dansi og þjálfarinn Tite tók meira að segja þátt í eitt skiptið.
Keane var hins vegar ekki skemmt. „Mér líkar ekki við þetta. Fólk segir að þetta sé þeirra menning en ég tel þetta óvirðingu við andstæðinginn. Þeir skoruðu fjögur mörk og gerðu þetta í öll skiptin,“ segir hann og tekur fram að honum hafi fundist það sérstaklega athyglisvert þegar Tite tók þátt.
Þessi ummæli Keane hafa ekki fallið vel í kramið í Brasilíu. Sjónvarpsstöðin TNT Sports tók hann til að mynda fyrir.
„Hæ Roy Keane. Líkar þér ekki við dansana? Það var nú verra því þetta er Brasilía. Það væri gaman að sjá hvort þú getir gert þetta. Tite mun dansa sama þó þér líki það eða ekki,“ var skrifað á Twitter-aðganga stöðvarinnar.
Sjónvarsstöðin Globo lét sitt ekki eftir liggja og fjallar vel um lágpunkta Keane á ferlinum. Tekin er fyrir ljót tækling hans á Alf-Inge Haaland og þegar samband hans við Mick McCarthy hjá írska landsliðinu súrnaði.
Luis Castro, aðalþjálfari Botafogo í Brasilíu, tjáði sig einnig um þetta. „Roy Keane skilur ekki menninguna í brasilískum fótbolta. Hann skilur ekki liðið. Hann talar á ófágaðan hátt um það sem gerðist.“
Almenningur í Brasilíu hjólar þá í Keane á samfélagsmiðlum, þar sem grófustu ummælin má finna.
