Íþróttalýsandinn vinsæli Hörður Magnússon var allt annað en hrifinn af spilamennsku pólska landsliðsins gegn Argentínu á Heimsmeistaramótinu í Katar í gær.

Argentína vann leikinn 2-0. Það kom ekki að sök fyrir Pólverja sem fara áfram í 16-liða úrslit á örlítið betri markatölu en Mexíkó, sem vann Sádi-Arabíu 2-1 á sama tíma.

Það var ekki mikill metnaður til að sækja fram á við hjá pólska liðinu í gær.

„Ég er ekki að segja að það sé þannig en það er nánast glæpur gegn mannkyni að Pólverjar hafi farið áfram. Ég biðst afsökunar á því til pólsku vina minna. En þetta upplegg, ég hef aldrei séð annað eins,“ sagði Hörður á HM kvöldi á RÚV eftir leikinn í gærkvöldi.

Pólland á erfitt verkefni fyrir höndum í 16-liða úrslitum. Þar verður Frakkland andstæðingurinn á sunnudag.

Argentína mætir aftur á móti Ástralíu á laugardagskvöld.