Íþróttalýsandinn Hörður Magnússon vakti lukku í gær er hann lýsti leik Belgíu og Kanada á Heimsmeistaramótinu í Katar.
Leiknum lauk með 1-0 sigri Belga, þar sem Kanada var þó betri aðilinn. Michy Batshuayi skoraði eina mark leiksins.
Það kom upp skemmtilegt atvik í leiknum þegar Hörður hélt að dómarinn hafi dæmt vítaspyrnu á Belga, svo var ekki, en hann hafði æst sig ansi vel í lýsingunni. Hann var hins vegar ekki sammála dómaranum.
Afar umdeild atvik í leiknum – Kanada vill fá dæmda aðra vítaspyrnu. Höddi Magg alveg viss, hvað finnst þér? pic.twitter.com/7runp9RMZr
— RÚV Íþróttir (@ruvithrottir) November 23, 2022
Þetta var til umræðu í HM-hlaðvarpi íþróttadeildar Torgs (Fréttablaðsins og DV) í dag.
„Hann spólaði þarna upp og var fljótur að sjá að þetta væri rangstaða,“ segir Hörður Snævar Jónsson. „Það er ekkert hægt að detta í símann þegar Höddi er að lýsa. Það er gleði og læti í þessu.“
Helgi Fannar Sigurðsson tók til máls og hrósaði Herði einnig.
„Maður fær nostalgíu líka því þegar ég var ungur að byrja að fylgjast með fótbolta var hann alltaf að lýsa. Hann gerir leikina skemmtilegri og er með frábæran leikskilning, segir fólki eitthvað sem það veit ekki endilega.“
Aron Guðmundsson tók í sama streng.
„Hann leyfir sér að sýna tilfinningar, fara upp á háa C-ið, vera ósammála dómaranum. Það er unun að horfa á leiki sem hann lýsir.“
Það má heyra umræðuna hér að neðan.
