Það er enginn leikmaður í Evrópu sem hefur byrjað tímabilið jafn vel og Erling Haaland, leikmaður Manchester City.

Haaland hefur skorað þrjár þrennur fyrir Man City í deildinni síðan hann kom frá Dortmund í sumar.

Norðmaðurinn gerði þrennu í 6-3 sigri á Manchester United í gær og er með 14 mörk í aðeins átta leikjum.

Ef Haaland heldur áfram að skora eins mikið og fær að spila 90 mínútur í hverjum leik þá skorar hann 56 mörk til viðbótar.

Leikmaðurinn myndi því skora 70 mörk í ensku deildinni ef honum tekst að halda áfram á sömu braut sem er þó ólíklegt enda um langt og strangt tímabil að ræða.

Markametið í deildinni stendur í 34 mörkum en Andy Cole og Alan Shearer náðu þeim áfanga á sínum tíma.

Allar líkur eru á að Haaland muni bæta þetta met en Man City á eftir að spila 30 deildarleiki á tímabilinu.

Einnig eru líkur á að Haaland endi uppi sem markahæsti leikmaður í sögu deildarinnar ef hann spilar með Englandsmeisturunum í mörg ár í viðbót.

Enski boltinn á 433 er í boði