Davíð Smári Lamude nýr þjálfari Vestra í Lengjudeild karla var gestur í íþróttavikunni hjá Benna Bó á Hringbraut á föstudagskvöld.
Davíð hefur síðustu ár unnið magnað starf hjá Kórdrengjum og komið liðinu upp úr neðstu deild upp í næst efstu deild. Eftir gott starf þar ákvað hann að taka skrefið til Vestra á Ísafirði.
„Þetta eru tíðindi, ég var nú búin að ræða þetta við mína nánustu að líklega yrði þetta mitt síðasta tímabil með Kórdrengi,“ sagði Davíð í þættinum.
Davíð hafði átt þátt í því að stofna Kórdrengi þegar liðið kom inn í fjórðu og neðstu deild hér á landi. Liðið var í tvö ár í þeirri deild en fór svo upp um þrjár deildir á þremur árum.
„Mínir nánustu hafa mögulega lekið því út því Sammi (Samúel Samúelsson, formaður knattspyrnuráðs hjá Vestra) var byrjaður að hlera mig aðeins. Ég var pínu óviss, það var eitt annað félag sem hleraði mig. Svo nelgdi Sammi inn tilboði og þá fóru hlutirnir af stað. Ég ræddi við stjórn Kórdrengja og átti erfitt spjall við þá.“
Davíð og fjölskylda hans munu á nýju ári flytja á Ísafjörð þar sem mikil vinna hefst við að smíða saman leikmannahóp Vestra
„Ég er mjög spenntur fyrir þessu. Ég verð fyrir vestan fyrir jól en verð ekki með fasta búsetu fyrr en í janúar.“
