Arnar Þór Viðarsson, þjálfari A landsliðs karla, hefur valið leikmannahóp fyrir fyrra nóvember-verkefni liðsins, sem mætir Sádi-Arabíu í Sameinuðu arabísku furstadæmunum 6. nóvember. Unnið er að staðfestingu annars leiks, sem yrði hluti af sama verkefni, og vonast KSÍ til að geta staðfest þann leik strax eftir helgi.
Arnar Þór Viðarsson: „Leikirnir í fyrra verkefninu eru ekki innan FIFA-glugga og þess vegna veljum við 23 manna hóp, með 5 leikmenn til vara þar sem það er óvissa með þátttöku nokkurra leikmanna sem gætu verið að leika með sínum félagsliðum í umspilsleikjum. Þetta á eftir að skýrast. Sú staða gæti komið upp að einhverjir þeirra leikmanna sem eru á varalistanum yrðu kallaðir inn í 23 manna hópinn og við erum að tilkynna hópinn svona snemma að þessu sinni til að leikmenn sem eru að ljúka keppnistímabilum með sínum félagsliðum geti gert viðeigandi ráðstafanir. Vonandi náum við að klára að staðfesta annan leik fyrr þennan hóp og það skýrist væntanlega strax eftir helgi.”
Markús Árni Vernharðsson leikgreinandi og Guðjón Örn Ingólfsson þolþjálfari, báðir frá Víkingi R., verða hluti af starfsliði landsliðsins í þessu verkefni. Arnar Þór: „Þetta styrkir samstarfið og gefur aðilum sem eru að standa sig mjög vel í tiltölulega nýjum störfum í íslenskri knattspyrnu möguleika á að vinna í landsliðsumhverfinu og gefur öllum aðilum möguleika á að læra af hver öðrum.”
Tíu leikmenn í hópnum hafa aldrei spilað landsleik. Sjö leikmenn koma frá Íslandsmeisturum Breiðabliks.
Hópurinn:
Frederik August Albrecht Schram (M) – Valur – 5 leikir
Hákon Rafn Valdimarsson (M) – IF Elfsborg – 2 leikir
Sindri Kristinn Ólafsson (M) – Keflavík
Viktor Örn Margeirsson – Breiðablik
Róbert Orri Þorkelsson – CF Montreal
Damir Muminovic – Breiðablik – 2 leikir
Guðlaugur Victor Pálsson – D.C. United – 31 leikur, 1 mark
Rúnar Þór Sigurgeirsson – Keflavík – 1 leikur
Logi Tómasson – Víkingur R.
Hörður Ingi Gunnarsson – Sogndal IL – 1 leikur
Höskuldur Gunnlaugsson – Breiðablik – 5 leikir
Ísak Snær Þorvaldsson – Breiðablik
Dagur Dan Þórhallsson – Breiðablik
Viktor Karl Einarsson – Breiðablik – 2 leikir
Daníel Hafsteinsson – KA
Viktor Örlygur Andrason – Víkingur R. – 2 leikir
Aron Einar Gunnarsson – Al Arabi – 99 leikir, 2 mörk
Bjarki Steinn Bjarkason – Venezia FC
Valdimar Þór Ingimundarson – Sogndal IL – 1 leikur
Jónatan Ingi Jónsson – Sogndal IL
Jason Daði Svanþórsson – Breiðablik – 1 leikur
Danijel Dejan Djuric – Víkingur R.
Óttar Magnús Karlsson – Oakland Roots – 9 leikir, 2 mörk
Leikmenn til vara
Ólafur Kristófer Helgason (M) – Fylkir
Ívar Örn Árnason – KA
Þorri Már Þórisson – KA
Ari Sigurpálsson – Víkingur R.
Adam Ægir Pálsson – Víkingur R.
Seinna nóvember-verkefni íslenska liðsins verður svo þátttaka í Baltic Cup þar sem leika Eystrasaltslöndin Eistland, Lettland og Litháen, auk gestaþjóðarinnar Íslands. Þar mætir Ísland Litháen í undanúrslitum og mætir svo annað hvort Eistlandi eða Lettlandi í úrslitaleik um sigur í mótinu eða í leik um 3. sætið. Leikdagarnir eru 16. og 19. nóvember og verður hópurinn fyrir það verkefni tilkynntur síðar.