Jurgen Klopp, stjóri Liverpool, hefur tjáð sig um bakvörðinn Trent Alexander-Arnold sem hefur legið undir töluverðri gagnrýni undanfarna mánuði.

Margir telja að Trent sé ekki nógu góður að sinna varnarvinnunni en er gríðarlega öflugur í sókninni.

Klopp segir það í raun fáránlegt að dæma Trent út frá einum eiginleika og skilur ekki gagnrýnina heilt yfir.

,,Hæfileikarnir sem hann er með, að vera svona mikilvægur þegar við erum með boltann, fyrir hægri bakvörð er þetta ruglað,“ sagði Klopp.

,,Ég veit ekki hvort ég hafi séð hægri bakvörð eins og hann áður. Hann sendir boltann hingað og þangað, skiptir um kant, tekur aukaspyrnur og hornspyrnur og ákvarðanatakan er svo fljót. Hann er framúrskarandi knattspyrnumaður.“

,,Ég bara skil þetta ekki. Samþykkjum við það bara að heimsklassa leikmaður sé dæmdur á einum eiginleika því hann er ekki jafn góður og aðrir á einu sviði?“

,,Ef hann væri ekki góður varnarmaður þá væri hann ekki að spila. Hann tekur þátt í öllu og gerir það vel.“