Englandsmeistarar Manchester City eru nálægt því að krækja í argentíska framherjann Julian Alvarez. BBC segir frá.

Alvarez hefur skorað 36 mörk í 96 leikjum með Argentínumeisturum River Plate og er talinn einn hæfileikaríkasti leikmaður Suður-Ameríku.

Ungstirnið var hluti af hópnum sem vann S-Ameríkukeppnina í júlí í fyrra. Framherjinn er samningsbundinn River Plate til desember 2022.

Pep Guardiola hefur áður talað um að liðið þurfi á hefðbundnum framherja að halda, en þrátt fyrir að vera án slíks framherja bróðurpart tímabils í fyrra vann City ensku úrvalsdeildina og er nú níu stigum á undan Liverpool á toppnum.

Alvarez, sem er 21 árs gamall, hefur leikið fimm leiki fyrir Argentínu, og var nýlega valinn í hóp liðsins fyrir leiki gegn Síle og Kólumbíu í undankeppni heimsmeistaramótsins í Katar.