Ralf Ragnick, bráðabirgðaknattspyrnustjóri Manchester United, telur að Paul Pogba, miðjumaður liðsins muni gefa allt sitt fyrir félagið það sem eftir lifir tímabils. Það muni gagnast honum sama hvort hann verði áfram eða ekki hjá félaginu.
Pogba á aðeins fimm mánuði eftir af samningi sínum við Manchester United og lítið virðist þokast í samningaviðræðum milli hans og Manchester United. Pogba er mættur aftur til æfinga eftir að hafa verið frá vegna meiðsla í rúma tvo og hálfa mánuði.
,,Fyrir mig snýst þetta ekki um hvort samningur leikmanns sé að renna út eða ekki. Spurningin er hversu mikið hann vill vera hluti af þessum hóp, hversu tilfinninga- og líkamlega vill hann vera með í þessu ferðalagi,“ sagði Ragnick á blaðamannafundi.
,,Afhverju ætti þettta ekki að gilda um Pogba? Hann vill sýna stuðningsmönnum Manchester United, stjórninni og öllum heiminum hvernig leikmaður hann getur verið. Jafnvel þó það væri bara til þess að vinna sér inn nýjan samning annarsstaðar,“ sagði Ragnick, bráðabirgðaknattspyrnustjóri Manchester United.
Pogba gekk til liðs við Manchester United á ný frá ítalska félaginu Juventus í ágúst árið 2016. Hann hefur spilað 219 leiki fyrir félagið, skorað 38 mörk og gefið 49 stoðsendingar.
Enski boltinn á 433 er í boði 
