Lögreglan á höfuborgarsvæðinu þurfti að hafa afskipti af reiðum stuðningsmanni ensks knattspyrnuliðs um helgina, þar sem hann missti stjórn á skapi sínu. Þetta kemur fram í dagbók lögreglu.
Miðað við lýsingu lögreglunnar má fastlega gera ráð fyrir að um stuðningsmann Manchester United hafa verið að ræða. Liðið tapaði afar illa, 4-0, gegn Brentford í ensku úrvalsdeildinni á laugardag.
„Útköll vegna fólks sem var til ama af ýmsum öðrum ástæðum voru að venju fjölmörg, en þar kom m.a. við sögu stuðningsmaður ensks knattspyrnuliðs sem missti stjórn á skapi sínu þegar lið hans fékk háðuglega útreið á laugardag,“ segir í dagbók lögreglu.
„Maðurinn var að horfa á leikinn í sjónvarpi og reiddist mjög, með tilheyrandi hljóðum, þegar fór að síga á ógæfuhliðina og mörkunum rigndi í vitlaust mark. Við þetta hringdu nágrannar stuðningsmannsins í lögreglu enda óttuðust þeir hið versta. Þegar hún kom á staðinn hafði ástandið róast og er vonandi að maðurinn nái að halda stillingu sinni næst þegar illa gengur hjá hans mönnum á fótboltavellinum.“