Nottingham Forest er í óða önn að styrkja sig fyrir átökin í ensku úrvalsdeildinni á komandi leiktíð. Liðið komst upp úr Championship-deildinni í vor og er því nýliði í deildinni.
Forest hefur þegar fengið Dean Henderson til liðs við sig á láni frá Manchester United. Henderson var varamarkvörður á Old Trafford og var í leit að auknum spiltíma. Hann fór á kostum á láni hjá Sheffield United tímabilið 2019-2020. Þá var liðið einmitt nýliði í úrvalsdeildinni.
Nú segir The Athletic að Forest vilji bæta við sig þeim Neco Williams frá Liverpool og Omar Richards frá Bayern. Vill félagið kaupa leikmennina.
Williams er velskur en hann lék á mála hjá Fulham seinni hluta síðustu leiktíðar.
Richards er enskur vinstri bakvörður. Hann kom til Bayern frá Reading í fyrra. Hann er þó varaskeifa þar.
Báðir myndu leikmennirnir fá meiri spiltíma hjá Forest en þeir fá hjá félögum sínum nú.