Rætt var um stöðu Jóns Dags Þorsteinssonar, í íþróttavikunni með Benna Bó sem er á dagskrá Hringbrautar alla föstudaga klukkan 21. Pálmi Rafna Pálmason, fyrirliði KR, sat í settinu með Herði Snævari Jónssyni, íþróttastjóra Torgs en farsinn í kringum AGF og Jón Dag tók nýja stefnu í vikunni þegar AGF kallaði aftur á Jón Dag.

„Þetta er ekki fyrsti leikmaðurinn í sögunni sem ætlar ekki að framlengja samninginn sinn. Að setja hann til hliðar alfarið og hann er í raun búinn að kveðja klúbbinn en svo allt í einu gerist eitthvað. Þetta verður svo ótrúverðug stjórnun hjá klúbbnum. Þetta er vissulega farsi,“ segir Pálmi.

Hann spurði sig hver pæling AGF væri með hegðun sinni. Af hverju það væri ekki verið að nota Jón Dag þó félagið viti að hann sé á förum frá félaginu. „Ég hef sjálfur verið að fara frá félagi og þetta er bara það sem gengur og gerist. Fólk kemur og fer. En að gera þetta svona er eiginlega magnað.“

Hörður segir að það sé skiljanlegt að setja hann að einhverju leyti til hliðar en hafa Jón Dag allavega á bekknum en ekki henda honum í frystikistuna. „Þetta sendir hræðileg skilaboð til leikmanna sem eru að fara til AGF í sumar. Að eiga hættuna á því að fá ekkert að spila nema viðkomandi framlengi samninginn sinn.

Stig Inge Björneby, yfirmaður knattspyrnumála hjá AGF lítur bara út eins og fífl í þessu öllu saman. Þeir eru komnir í fallséns og þá taka þeir upp tólið og hringja í Jón Dag.“

Pálmi sem spilaði lengi sem atvinnumaður tekur undir að Jón Dagur komi út úr þessum aðstæðum sem sigurvegari. „Það er allt mjög steikt sem er í gangi þarna. Gott og blessað að leyfa ungum leikmönnum að spreyta sig. En þeir voru ekki öruggir og þá spilar þú bara á þínu sterkasta liði.

Núna eru þeir að koma með skottið á milli lappana og biðja Jón Dag um að koma og hjálpa.“

Hörður segir að það sé skrifað í skýin að Jón Dagur tryggi AGF sigurinn í næsta leik sem er um helgina.

Alla umræðuna má sjá hér að neðan.