Manchester United vann dramatískan sigur á West Ham í ensku úrvalsdeildinni í dag. Leikið var á Old Trafford.
Man Utd var betri aðilinn í fyrri hálfleik en tókst þó ekki að skapa mörg góð færi. Cristiano Ronaldo fékk það sem verður að teljast sem besta færi fyrri hálfleiks á 20. mínútu en tókst ekki að skora.
Það stefndi í markalaust jafntefli þar til á þriðju mínútu uppbótartíma. Þá geystust heimamenn upp í sókn sem lauk með því að Edinson Cavani renndi boltanum fyrir markið á Marcus Rashford sem potaði boltanum inn fyrir línuna. Lokatölur 1-0. Ótrúlega mikilvæg stig fyrir Man Utd í Meistaradeildarbaráttunni.
Man Utd er nú í fjórða sæti með 38 stig, stigi á undan West Ham.
Newcastle með mikilvægan sigur
Á sama tíma vann Newcastle 0-1 sigur á Leeds á útivelli.
Jonjo Shelvey gerði eina mark leiksins þegar stundarfjórðungur var eftir. Markið skoraði hann beint úr aukaspyrnu.
Newcastle er nú í átjánda sæti deildarinnar með 15 stig, 7 stigum á eftir Leeds sem er í fimmtánda sæti.
Leikur Brentford og Wolves hófst á sama tíma og leikirnir tveir að ofan. Það varð hins vegar mikil töf á honum vegna dróna sem flaug yfir völlinn. Staðan er 1-1 þegar rúmur stundarfjórðungur er eftir.