Antonio Conte, knattspyrnustjóri Tottenham, viðurkenndi að félagið gæti þurft að nota tækifærið í janúarglugganum og bæta í leikmannahópinn.
Ítalinn á enn eftir að kaupa einn einasta leikmann til félagsins en hans menn eru taplausir í deildinni síðan hann tók við stjórnvölunum í nóvember.
Conte hefur hins vegar fundað með Fabio Paratici, yfirmanni knattspyrnumála, og Daniel Levy, stjórnarformanni félagsins um möguleg leikmannakaup í janúarglugganum.
Tottenham er í sjötta sæti deildarinnar, fjórum stigum á eftir West Ham í fjórða sæti en þeir hvítklæddu eiga fjóra leiki til góða á granna sína í Lundúnum.
Þessi fyrrum stjóri Chelsea og ítalska landsliðsins vill bæta í sóknarleik liðsins og fá til sín skapandi miðjumann og annan sóknarmann. Hann segir að hans menn þurfi á liðsauka að halda en segir jafnframt snúið að gera góð kaup í janúarglugganum.
„Ég veit að janúarglugginn er alltaf erfiður og það er auðveldara að kaupa leikmenn í upphafi tímabils,“ sagði Conte.
„Það er ekki auðvelt í janúar, en á sama tíma þá vitum við að ef tækifæri gefst, þó að það sé ekki besta tækifærið, þá þurfum við að gera eitthvað.
Ég endurtek að þetta er kannski ekki besti tíminn en ég tel okkur vera í stöðu þar sem við þurfum að bæta í leikmannahópinn því hann er ekki svo stór. “