Þróttur Reykjavík vann góðan endurkomusigur gegn Víkingi Ólafsvík í Lengjudeild karla í dag. Leikið var í Laugardal.
Sam Ford kom heimamönnum yfir á 3. mínútu leiksins. Stuttu síðar jafnaði Harley Willard fyrir Ólsara.
Eftir rúman hálftíma leik kom Simon Dominguwz Colina gestunum svo yfir. Staðan í hálfleik var 1-2.
Sam Hewson jafnaði metin fyrir Þrótt eftir um klukkutíma leik með marki af vítapunktinum.
Það var svo á síðustu tíu mínútum leiksins sem heimamenn gengu frá leiknum.
Fyrst kom Róbert Hauksson þeim yfir. Í blálokin skoruðu svo þeir Kairo Edwards-John og Daði Bergsson. Lokatölur 5-2.
Sam Ford nældi sér í rautt spjald áður en lokaflautið gall.
Þróttur er í ellefta sæti, 6 stigum frá Þór í síðasta örugga sætinu þegar tvær umferðir eru eftir. Þór er þó með aðeins -4 mörk í mínus á markatölu á meðan Þróttarar eru með -12. Liðin mætast í lokaumferðinni. Veik von Þróttar lifir í bili.
Ólsarar eru með 5 stig í neðsta sæti, fallnir úr Lengjudeildinni.