Dómari meiddist eftir að reiðir stuðningsmenn Velez Mostar í Bosníu & Herzegóvínu kveiktu í bifreið sem hann var í eftir leik gegn Borac Banja Luka á dögunum.
Bosníski miðillinn Klik segir frá því að Sabrija Topalovic, dómari, ásamt tveimur aðstoðarmönnum hans hafi orðið fyrir árás stuðningsmanna eftir leikinn. Veist hafi verið að þeim með hafnaboltakylfum í leikmannagöngunum eftir leik. Síðan var kveikt í bíl Topalovic fyrir utan völlinn.
Stuðningsmennirnir flúðu svo vettvang á golfbíl.
Einn dómaranna, Adnan Alispahic, meiddist lítillega í árásinni á bílinn og var komið á sjúkrahús.
Ástæða ofbeldisins var sú að stuðningsmenn Velez Mostar voru virkilega óánægðir með frammistöðu dómaranna í leiknum. Hann tapaðist 0-3.