Hjörvar Hafliðason einn ástsælasti sérfræðingur í íslenska boltanum hefur vakið athygli á því að Guðmundur Steinn Hafsteinsson framherji Fylkis var hvergi sjáanlegur þegar liðið mætti Keflavík, í efstu deild karla um helgina. Guðmundur gaf ekki kost á sér í leikinn vegna brúðkaups hjá vini sínum.
Fylkir berst við falldrauginn í efstu deild karla en Guðmundur gekk í raðir félagsins á dögunum. Hjörvar sagðist hafa átt mörg samtöl við Árbæinga sem eru ósáttir með Guðmund Stein.
„Þeir eru ekki hrifnir, það er keyptur framherji. Guðmundur Steinn, það er mikilvægur 9 stiga leikur við Keflavík. Enginn Guðmundur Steinn, menn fara að velta því fyrir sér hvar hann er. Hann var staddur í brúðkaupi,“ sagði Hjörvar í Dr. Football í dag en leiknum lauk með 1-1 jafntefli.
Það átti sér stað frægt atvik árið 2019 þegar Hannes Þór Halldórsson fór í brúðkaup og missti af leik hjá Val, markvörðurinn var meiddur og fékk frí.
„Það var allt vitlaust þegar maður missti af leik út af brúðkaupi,“ sagði Hjörvar og átti þar við Hannes Þór.
Hjörvar hélt svo áfram. „Hvernig ætlar þú að fá ást í Árbænum þegar þú getur ekki mætt í leiki?,“ sagði Hjörvar og var fúlasta alvara.
Arnar Sveinn Geirsson tók þá til máls og kom Guðmundi til varnar. „Þetta er góður félagi minn, hann samdi svona. Þetta segir ekkert um karakterinn, hann er að fara í brúðkaup hjá góðum vini sínum.“
Hjörvar segir að þeir Árbæingar sem hann hafi rætt við séu verulega ósáttir. „Vinir mínir í Árbænum tala um að þetta sé fjósa klúbbur, þarna sé það staðfest.“