Helgi Valur Daníelsson, leikmaður Fylkis, mun leggja skóna á hilluna eftir yfirstandandi keppnistímabil. Hann verður fertugur í næstu viku.
Ferill hans hefur verið merkilegur að mörgu leyti. Hann hætti knattspyrnuiðkun árið 2015 en tók skóna aftur af hilluna fyrir leiktíðina 2018. Þá skrifaði hann undir hjá Fylki.
Í fyrra meiddist hann svo illa, fjórbrotnaði á fæti. Margir héldu að ferlinum væri þá endanlega lokið en allt kom fyrir ekki. Helgi kom sterkur til baka.
,,Maður hélt að þetta væri búið þegar maður sá þetta brot í fyrra. Hann er bara varla mennskur,“ sagði Kristján Óli Sigurðsson í nýjasta þætti Dr. Football.
Hörður Snævar Jónsson var einnig í þættinum og kvaðst bera mikla virðingu fyrir endurkomu Helga.
,,Maður ber mikla virðingu fyrir því að nenna því 39 ára ,ekkert að sanna, að koma til baka og gera það svona.“
Helgi á glæstan feril að baki en hann spilaði lengi erlendis með liðum eins og Peterborough í Englandi, Öster, Elfsborg og AIK í Svíþjóð, Hansa Rostock í Þýskalandi, Beleneses í Portúgal og AGF í Danmörku.
Þá lék hann 38 leiki með yngri landsliðum Íslands og 33 leiki með A-landsliðinu.