Everton goðsögnin, Duncan Ferguson, hafnaði því að fylgja Carlo Ancelotti til Real Madrid og halda áfram í þjálfarateymi hans vegna þess að hann vill ná árangri á Goodison Park samkvæmt ýmsum breskum miðlum.

Ferguson var hluti af þjálfarateymi Ancelotti hjá Everton og fékk boð um að halda til spænsku stórborgarinnar en hafnaði því.

The Sun greinir frá því að Ferguson telji sig tilbúinn til þess að taka við starfi Ancelotti hjá Everton, en hann tók við tímabundið árið 2019 og stýrði liðinu í þremur leikjum þar sem hann sótti fimm stig.

Ferguson er afar vinsæll innan Everton en hann spilaði hjá félaginu í rúmlega 10 ár og hefur lengi verið hluti af þjálfarateyminu.

Í grein The Sun segir einnig að ef Ferguson fái starfið þá muni hann gera Lee Carsley, fyrrum liðsfélaga sinn, að aðstoðarmanni.

Nuno Espirito Santo er einn af þeim sem Everton hefur verið að skoða eftir brottför Ancelotti. Þá er óvissa með stöðu ýmissa leikmanna hjá félaginu en James Rodriguez og Richarlison eru sagðir vilja leita á önnur mið.

Enski boltinn á 433 er í boði