Jamie Carragher, fyrrum liðsfélagi Sterling hjá Liverpool, skilur ekkert í þeirri umræðu að Raheem Sterling gæti verið á leið til Tottenham. Manchester City vill fá Harry Kane frá Tottenham og ætlar sér að nota Sterling sem skiptimynt.
Sportsmail sagði frá því í síðasta mánuði að Pep Guardiola vildi losna við Sterling og ætlar klúbburinn að setja hann á sölu til að geta fengið Harry Kane og Jack Grealish til liðsins.
„Ég trúi ekki að ég hafi verið að lesa það að Sterling ætti að koma inn í þennan samning. Með fullri virðingu, heldur fólk í alvöru að Sterling sé á þeim tímapunkti á ferlinum að hann fari til Tottenham,“ sagði Carragher í dálki sínum í Telegraph.
„Er fólki alvara?, ef hann er til sölu þá eru ýmsir Meistaradeildarklúbbar að bíða eftir honum í röðum.“
Sterling hefur byrjað alla þrjá leiki Englendinga á Evrópumótinu í knattspyrnu og skorað tvö mörk, einu mörk Englands á mótinu.