Ummæli brasilíska vængmannsins Willian frá því síðasta sumar hafa verið rifjuð upp eftir tap Arsenal í undanúrslitum Evrópudeildarinnar í gær. Þar sagðist hann ætla að vinna Meistaradeildina með liðinu innan þriggja ára.
Willian hefur átt ansi erfitt uppdráttar frá því að hann kom til Arsenal frá Chelsea á frjálsri sölu síðasta sumar. Hann var þó með stórar yfirlýsingar í upphafi tíma síns hjá Arsenal.
,,Ein af ástæðunum fyrir því að ég vildi þriggja ára samning var því ég vildi vera hluti af áætlunum liðsins, ekki bara leikmaður sem kemur og fer,“ sagði Willian við The Sun eftir að hann mætti til Arsenal.
,,Þegar ég talaði við stjórann (Mikel Arteta) sagði hann mér af hverju hann þyrfti mig í þrjú ár. Það var af því að hann vildi fyrst komast í Meistaradeildina aftur og svo vinna hana áður en ég færi. Það var það sem ég vildi heyra.“
Það er óhætt að segja að þessar áætlanir Willian og Arteta hafi farið fyrir ofan garð og neðan. Arsenal missti af síðasta tækifæri sínu til þess að ná Meistaradeildarsæti á næstu leiktíð eftir að hafa fallið úr leik í Evrópudeildinni gegn Villarreal í gær. Sigur í Evrópudeildinni veitir nefnilega sæti í deild þeirra bestu. Þá er Arsenal langt frá efstu fjórum sætum ensku úrvalsdeildarinnar, sem gefa sæti í Meistaradeildinni.