Manchester United skoðar nú öryggisgæsluna í kringum Ole Gunnar Solskjær stjóra félagsins eftir atvik sem átti sér stað í Manchester á sunnudag.

Solskjær var þá að yfirgefa The Lowry hótelið í miðborginni fyrir leikinn gegn Brighton, United dvelur á hótelinu fyrir alla heimaleiki.

Þegar Solskjær gekk út af hótelinu mætti honum æstur stuðningsmaður sem heimtaði áritun, ekki svo óalgengt en aðilinn átti ekki að komast upp að Solskjær í þessu atviki.

Solskjær komst að ökutæki sínu og ók af stað en þá var bíll sem elti hann frá hótelinu, þegar stoppað var á rauðu ljósi stökk sá aðili út úr bíl sínum og barði hressilega í rúðuna á bíl Solskjær.

Forráðamenn United telja að atvikið sé einsdæmi en ætla ekki að taka neina sénsa, öryggisgæsla í kringum ferðir Solskjær eru í skoðun.

Félög á Englandi hafa talsverðar áhyggjur af öryggi leikmanna og þjálfara eftir að brotist var inn á heimili Robin Olsen, markvarðar Everton á dögunum. Vopnaðir menn mættu þá inn á heimili hans og ógnuðu bæði konu hans og börnum.

Enski boltinn á 433 er í boði