Marcus Bent, fyrrverandi leikmaður Everton, vill að sitt gamla félag, kaupi nýja tíu í sumar. Hann segir Gylfa Sigurðsson, skorta stöðugleika.

Bent segir að of margir leikmenn hafi ekki alveg staðið undir væntingum og hafi ekki skilað nægilega miklu. Hann nefnir sem dæmi Gylfa Sigurðsson.

„Gylfi er góður leikmaður, við vitum það en hann hefur ekki sýnt nægilega mikinn stöðugleika,“ sagði Marcus Bent í viðtali hjá This is Futbol.

Hann segir að það gæti ráðist á því hversu vel Gylfi spilar í síðustu leikjum tímabilsins, hvort hann fái nýjan samning hjá Everton.

„Ef hann getur sýnt okkur úr hverju hann er gerður núna undir lok tímabils, þá gætu forráðamenn Everton gefið honum nýjan samning þar sem hann mun aðeins eiga eitt ár eftir á sínum núverandi samning,“ sagði Marcus Bent, fyrrverandi leikmaður Everton

Gylfi hefur spilað 37 leiki fyrir Everton á tímabilinu, skorað 8 mörk, þar á meðal tvö gegn Tottenham í síðustu umferð ensku úrvalsdeildarinnar. Þá hefur hann gefið níu stoðsendingar á tímabilinu.

Gylfi gekk til liðs við Everton frá Swansea City í ágúst árið 2017. Hann á að baki 149 leiki fyrir félagið, hefur skorað 31 mark og gefið 24 stoðsendingar.

Enski boltinn á 433 er í boði