Ed Woodward stjórnarformaður Manchester United hélt neyðarfund með leikmönnum félagisns í gær til að ræða við þá um Ofurdeildina. Á sunnudag kom í ljós að tólf stór félög ætla að stofna deild sem mun gefa þeim mikla fjármuni.
Með því eru tólf af stærstu félögum Evrópu að hætta í Meistaradeildinni og öðrum Evrópukeppnum sem þarf að vinna sér sæti í. Í Ofurdeildinni verður lífið auðveldara, félögin sem stofna deildina eiga öruggt sæti í henni ár eftir ár.
Enskir blaðamenn komust að stofnun deildarinnar snemma á sunnudag en félögin staðfestu svo stofnun hennar síðar um kvöldið. Leikmenn og þjálfarar liðanna virðast ekkert hafa vitað um málið fyrr en yfirlýsing um málið kom.
Leikmenn United vildu fá svör frá Woodward í gær og mætti hann á fund þeirra í gærmorgun, leikmenn United eru flestir ekki hrifnir af því skrefi sem eigendur félagsins hafa stigið.
Þeir telja að Ole Gunnar Solskjær hafi verið hent undir rútuna á sunnudag, stjórinn þurfti að svara fyrir Ofurdeildina eftir sigur á Burnley. Solskjær hafði enga hugmynd um hvað væri í gangi enda höfðu eigendurnir ekkert látið í sér heyra.
Woodward ku hafa reynt að útskýra fyrir leikmönnum hvað væri í gangi, hann sagði þetta ákvörðun sem væri tekin með hagsmuni United í huga. Samkvæmt frétt Daily Mail voru útskýringar Woodward ekki að ná til leikmanna United.
Stofnfélög deildarinnar eru:
Arsenal
Chelsea
Liverpool
Manchester City
Manchester United
Tottenham
Atlético Madrid
Barcelona
Real Madrid
AC Milan
Inter Milan
Juventus.
Enski boltinn á 433 er í boði 
