Jurgen Klopp hefur beðist afsökunar á því að hafa gert lítið úr vellinum sem Real Madrid notar þessa dagana, Klopp var pirraður eftir 3-1 tap gegn Real Madrid í Meistaradeildinni í síðustu viku.

Leikurinn fór fram á æfingasvæði Real Madrid sem er með 6 þúsund manna stúku, Real notar völlinn á meðan verið er að breyta og bæta heimavöllinn sinn. Klopp sagði eftir leik að það hefði verið skrýtið og erfitt að spila á svona velli, að allt yrði öðruvísi í kvöld á Anfield.

„Fólk hefur gert svo mikið úr þessu, ég ætlaði ekki að vera með óvirðingu. Ef þeim finnst þessi völlur góður og vilja spila á honum, þá er það í lagi fyrir mig,“ sagði Klopp

Síðari leikurinn er á Anfield í kvöld en eins og allt síðasta árið verður heimavöllur Liverpool tómur.

„Þeir spila allt tímabilið þarna, ég veit hver staðan er og ástæðu þess. Ég ætlaði ekki að vera með óvirðingu, ég biðst afsökunar á því. Að gera stórfrétt úr þessu er samt grín.“