Southampton og Chelsea mættust í fyrstu viðureign dagsins í ensku úrvalsdeildinni í dag.
Á 33. mínútu leiksins náði Takumi Minamino að koma Southampton yfir í leiknum eftir stoðsendingu frá Nathan Redmond. Minamino hefur heldur betur farið vel af stað hjá Southampton en hann fór þangað á láni frá Liverpool í byrjun árs. Hann hefur nú leikið þrjá leiki með liðinu og skorað tvö mörk.
Southampton leiddi í hálfleik þrátt fyrir tilraunir Chelsea til að jafna metin. Þegar tæp klukkustund var liðin af leiknum fékk Chelsea víti. Mason Mount fór á punktinn, skoraði og jafnaði leikinn í 1-1.
Chelsea átti mun fleiri hættulegar sóknir í leiknum og var á blaði mun betra liðið. Þrátt fyrir það voru ekki fleiri mörk skoruð og endaði leikurinn því með 1-1 jafntefli. Með stiginu kemst Chelsea upp í fjórða sæti deildarinnar en West Ham og Liverpool eiga bæði leik til góða og geta náð sætinu með sigri.