Íslenski landsliðsmaðurinn Hjörtur Hermannsson var í byrjunarliði Pisa er liðið tók á móti Perugia í ítölsku B-deildinni í kvöld.
Leiknum lauk með 1-1 jafntefli sem þýðir að Pisa er enn á toppi deildarinnar þegar 15 umferðum er lokið. Brescia er í 2. sæti með 27 stig, tveimur stigum á eftir Pisa sem hefur leikið einum leik fleiri.
Davide Marsursa kom heimamönnum yfir eftir ellefu mínútna leik og staðan 1-0 þegar liðin gengu til búningsherbergja. Manuel De Luca jafnaði metin af vítapunktinum á 72. mínútu og staðan orðin 1-1.
Gianmaria Zanandrea, varnarmaður Perugia, var rekinn af velli á 79. mínútu þegar hann fékk að líta sitt annað gula spjald í leiknum og þar með rautt. Pisa tókst ekki að skora sigurmarkið þrátt fyrir að vera manni fleiri og niðurtaðan jafntefli.