Eins og oft áður lék fjöldi Íslendinga í norsku úrvalsdeildinni í dag.

Viðar Ari Jónsson lék allan leikinn með Sandefjörd í 1-2 sigri gegn Haugesund.

Sandefjörd er í ellefta sæti deildarinnar með 33 stig þegar tvær umferðir eru eftir.

Patrik Sigurður Gunnarsson stóð í marki Viking í 2-3 sigri gegn Brynjólfi Andersen og félögum í Kristiansund. Brynjólfur kom inn á sem varamaður seint í leiknum.

Viking er í þriðja sæti með 51 stig. Liðið hefur tryggt sér Evrópusæti. Kristiansund er í sjötta sæti með 43 stig.

Hólmar Örn Eyjólfsson, leikmaður Rosenborg, og Alfons Sampsted, leikmaður Bodo/Glimt, léku báðir allan leikin er lið þeirra mættust. Leiknum lauk með markalausu jafntefli.

Bodo/Glimt er á toppi deildarinnar með 59 stig. Rosenborg er í fimmta sæti með 44 stig.

Adam Örn Arnarson sat allan leikinn á varamannabekk Tromsö í markalausu jafntefli gegn Stabæk.

Tromsö er með 32 stig í tólfta sæti. Liðið er nú öruggt frá falli.