Hreint ótrúlegur leikur fór fram í í ensku úrvalsdeildinni í gær er Manchester United tók á móti erkifjendunum í Liverpool. Liverpool vann 5-0 stórsigur á United í leiknum. Cristiano Ronaldo hefur sent frá sér stutta yfirlýsingu vegna þess.
Liverpool byrjaði af krafti en Keita kom þeim yfir eftir fimm mínútur og Jota tvöfaldaði forystuna tæpum tíu mínútum síðar. Leikurinn róaðist aðeins eftir það þar til Salah skoraði þriðja markið á 38. mínútu. Salah gerði svo út um leikinn í uppbótartíma fyrri hálfleiks þegar hann skoraði fjórða mark Liverpool. Staðan var því 4-0 fyrir gestunum í hálfleik, hreint ótrúlegar tölur og stuðningsmenn púuðu á sitt lið er það gekk til búningsklefa.
Salah fullkomnaði þrennuna í byrjun seinni hálfleiks og leikmenn Manchester United virtust hreinlega vera búnir að gefast upp. Stuttu síðar kom Ronaldo knettinum í netið en markið var dæmt af vegna rangstöðu. Á 60. mínútu fékk Pogba að líta beint rautt spjald eftir tæklingu á Naby Keita og leikmenn United því orðnir tíu og verkefnið erfitt.
Leikurinn róaðist nokkuð eftir það og ekki voru fleiri mörk skoruð og ótrúlegur 5-0 sigur Liverpool staðreynd í gær. Cristian Ronaldo var í sárum að leik loknum. Þessi magnaði knattspyrnumaður er mættur aftur í enska boltann en ljóst er að hann upplifir vonbrigði með stöðuna sem United er í.
„Stundum eru úrslitin ekki þau sem við viljum berjast fyrir, stundum fer leikurinn ekki eins og við viljum. Þetta er okkur að kenna,“ skrifar Cristiano Ronaldo í færslu á Instagram að leik loknum.
„Þetta er bara okkur að kenna, það er engum öðrum um að kenna. Stuðningsmenn okkar voru frábærir. Þeir eiga betra skilið en þetta, miklu betra. Það er undir okkur komið að standa okkur, núna er tímapunkturinn.“