Íslenska kvennalandsliðið í knattspyrnu mætir Tékklandi í undankeppni HM 2023 á Laugardalsvelli á morgun. Um gífurlega mikilvægan leik er að ræða fyrir íslenska landsliðið en lítill áhugi er á leiknum meðal almennings ef marka má selda miða á leikinn.
Aðeins eru um 800 seldir á leik morgundagsins en Jóhann Ólafur Sigurðsson, samskiptastjóri Knattspyrnusambands Íslands, greindi frá þessu á blaðamannafundi í dag.
Íslenska liðið tapaði fyrsta leik sínum í keppninni gegn Hollandi í síðasta mánuði en reynir að komast aftur á sigurbraut á morgun. Leikurinn hefst klukkan 18:45.
Allir leikmenn Íslands eru klárir fyrir verkefni morgundagsins, engin meiðsli eru að hrjá núverandi leikmannahóp.