Ole Gunnar Solskjær, knattspyrnustjóri Manchester United, byrjaði blaðamannafund sinn í dag fyrir leikinn mikilvæga gegn Atalanta í Meistaradeild Evrópu, með því að skamma blaðamenn sem þar voru mættir.

Athugasemdir sem Ole Gunnars Solskjær, knattspyrnustjóra Manchester United lét falla í garð Marcusar Rashford, eftir 4-2 tap liðsins gegn Leicester City í ensku úrvalsdeildinni um helgina vöktu athygli og féllu í grýttan jarðveg hjá fólki sem hefur unnið náið með Rashford í gegnum tíðina.

,,Þið vitið hvað hann hefur gert utan vallar, hann hefur gert frábæra hluti. En nú er kannski kominn tími til fyrir hann að setja knattspyrnuna í forgang og einbeita sér að henni,“ var á meðal þess sem Solskjær sagði í viðtali eftir leik.

Blaðamenn túlkuðu þessi orð Solskjær þannig að hann vildi að Rashford, sem hefur verið ötull baráttumaður fyrir yngri kynslóðina í Bretlandi og vakið athygli á fátækt og hungursneyð, einbeitti sér frekar að knattspyrnuiðkun næstu vikurnar. Rashford hefur fengið fjölda viðurkenninga fyrir sín störf.

Á blaðamannafundinum í dag segir Solskjær að blaðamenn hafi snúið út úr orðum sínum. ,,Náum fílnum út úr herberginu. Við erum ótrúlega stolt af Rashford innan og utan vallar. Þið gerðuð fyrirsagnir út frá einni athugasemd minni. Mín meining var að hann ætti að einbeita sér að því að mæta til æfinga án þess að finna til í öxlinni eða bakinu,“ sagði Solskjær á blaðamannafundinum en Rashford var þar einnig með honum.

Rashford sneri aftur í leikmannahóp Manchester United um helgina eftir erfið axlarmeiðsli. Leikmaðurinn kom inn á í seinni hálfleik og  tókst meðal annars að skora seinna mark liðsins í tapinu.

Enski boltinn á 433 er í boði