Jason Daði Svanþórsson leikmaður Breiðabliks verður á reynslu hjá danska félaginu AGF næstu daga. Það var Kristján Óli Sigurðsson sem sagði frá þessu í hlaðvarpsþættinum Þungavigtin í dag.
Jason Daði var að klára sitt fyrsta tímabil í efstu deild en Breiðablik keypti hann frá Aftureldingu fyrir ári síðan. Mun Jason dvelja hjá danska félaginu í viku.
Jason sem er 22 ára gamall kantmaður átti góðu gengi að fagna hjá Blikum. Hann ógnar sífellt með hraða sínum og krafti.
Tveir íslenskir leikmenn eru í herbúðum AGF en það eru þeir Mikael Neville Anderson og Jón Dagur Þorsteinsson. Báðir eiga fast sæti í landsliðshópi Íslands.
Jason lék 20 deildarleiki með Blikum í sumar og skoraði í þeim sex mörk. Blikar enduðu í öðru sæti efstu deildar karla.