Eftir frábæra byrjun á tímabilinu og tólf stig af fimmtán mögulegum í fyrstu fimm leikjum ensku úrvalsdeildarinnar, hefur Manchester United fatast flugið.
Liðið tapaði á móti Aston Villa á heimavelli og gerði jafntefli við Everton. Fimm töpuð stig í baráttunni um enska meistaratitilinn en liðið er samt sem áður aðeins tveimur stigum frá toppliði Chelsea.
Næstu fjörutíu og fimm dagar geta gefið góða vísbendingu um hvert Manchester United stefnir á tímabilinu. Á þessum fjörutíu og fimm dögum mætir United meðal annars: Leicester City, Liverpool, Tottenham, Manchester City Chelsea og Arsenal.
Vandræði með varnarlínu Manchester United veldur Ole Gunnar Solskjær, knattspyrnustjóra liðsins, vafalaust miklum hausverk. Aðal miðvarðapar liðsins er frá eins og er. Harry Maguire er ekki byrjaður að æfa á fullu eftir meiðsli og Raphael Varane meiddist í nýafstöðnu landsleikjahléi með franska landsliðinu, hann verður frá í nokkrar vikur.
Vonast er til þess að Maguire snúi aftur í liðið fyrr en seinna en mögulegir arftakar hans og Varane eru Victor Lindelof, Phil Jones og Eric Bailly.