Jamie Carragher, fyrrverandi leikmaður Liverpool og núverandi sérfræðingur um ensku úrvalsdeildina hjá Sky Sports, skaut harkalega á kollega sína Gary Neville og Roy Keane í hlaðvarpsþætti Tony Bellew á dögunum.
Carragher sakaði þá um að halda aftur af gagnrýni sinni á Ole Gunnar Solskjær, knattspyrnustjóra Manchester United sökum þess að hann sé kunningi þeirra og fyrrum liðsfélagi.
Eftir að hafa endaði í 2. sæti ensku úrvalsdeildarinnar á síðasta tímabili ákváðu forráðamenn Manchester United að eyða miklum fjárhæðum í leikmannakaup í sumar.
Félagið eyddi stórum fjárhæðum í kaup á varnarmanninum Raphael Varane frá Real Madrid og kantmaðurinn Jadon Sancho var fenginn inn frá Borussia Dortmund fyrir rúmar 73 milljónir punda.
Rúsínan í pylsuendanum var hins vegar endurkoma Cristiano Ronaldo til félagsins en hann kom á frjálsri sölu frá Juventus.
Ronaldo hefur skorað fimm mörk í fyrstu sjö leikjum sínum fyrir Rauðu djöflana en eftir aðeins tvo sigra í síðustu sex leikjum er pressan á Ole Gunnar Solskjær farin að aukast.
„Gary Neville er sífellt að koma með afsakanir fyrir Solskjær. Hann og Roy Keane eru sífellt að verja hann af því að hann spilaði með þeim og er kunningi þeirra,“ sagði Carragher í hlaðvarpsþætti á dögunum.
Carragher segir afsakanir Neville og Keane ekki halda neinu vatni.
„Ég sit hérna og hugsa með mér að þið (Manchester United) sömduð við leikmann sem hefur unnið Meistaradeild Evrópu í fjórgang, eydduð í kringum 75 milljónum í kantmann, lentuð í 2. sæti í deildinni á síðasta tímabili, töpuðuð ekki leik á útivelli. Það er bara eitt skref eftir. Þetta pirraði mig svo mikið að ég er að skrifa blaðagrein um þetta,“ sagði Jamie Carragher, sérfræðingur á Sky Sports.